| Fairy Kiss|
Explorers 發現新大陸！吉野家除左買牛肉飯，宜家原來仲賣埋雪糕。重點係雪糕好平，如果係吉野家食野憑單據可以加$ 6 換購雪糕一杯，就咁買都只係$ 10 或以上。
不過 抹茶控Explorers 就試左抹茶格仔餅黑糖紅豆 （$ 25），相比起出面甜品鋪頭都算平。因為格仔餅即叫即整，大概要等10分鐘先有。賣相好靚，食落就不過不失。格仔餅綠茶味不重，淡淡的，不過襯熱食一流。 而雪糕本身無特別味道，但上面加左黑糖醬，甜甜地，彌補番雪糕嘅味道。不過呢個價錢，都係抵食之選。
Edited by SPD4459 Five Explorers: Joey Chan
SPD4459 Internet Marketing and Public Relations
今個周末有咩搞呢？無野做不如要約埋朋友仔、男朋友、女朋友…聽日一齊黎觀塘秋日美食節啦！唔想去灣仔美食節咁遠，原來去九龍區美食節都得喎。美食節得22、23號舉行架咋，大家唔好錯過！
雖然秋日美食節規模唔算好大，但都有超過四十個美食攤位，俾大家食盡世界國地嘅美食，日本、泰國、英國、法國等等…….
今次 Explorers 就試咗台式飲品 Color ChaCha。其實 Explorer 之前去美食節已經想試，但去到就賣晒無得試。今日俾 Explorers 發現到仲唔第一時間買咗先！ 今次就試咗最愛嘅士多啤梨味 ($ 25)，外表好靚，岩晒港女影相握like!
佢上面淺藍紫色個層其實係奶黎，下面粉紅色就係strawberry，飲落味道似士多啤梨奶昔，入面仲有少少士多啤梨籽，但又唔會過份甜。不過$25咁大枝都幾抵，佢仲有其他珍珠奶茶、果汁俾大家任均選擇。
如果大家仲想知有邊啲美食店，可以上 FACEBOOK睇下。
https://www.facebook.com/hongkongfestival/
如果大家行完美食節，仲可以係地下影文青相 tim。
Edited by Five Explorers: Joey Chan
SPD4459 Internet Marketing and Public Relations
志明與春嬌呢套戲相信大家都已經睇過好多次喇，今次Explorers 帶大家重返戲中…入面條橋…做一日偽偽偽文青先。
其實平時唔算有太多人行呢條牛頭角偉業街天橋，反而多文青嚟影相，Explorers都要唔執輸，扮下文青影相先。無論左影右影都無問題，不過其實呢條橋快影 15分鐘都已經可以影完，因為…真係得條橋影。但如果想充實啲，可以跟住 Explorers 一日觀塘、九龍灣遊。
| Explorers 建議路線 |
牛頭角港鐵 B6 出口，一直向前行大約10-15分鐘，就會見到上回為大家介紹嘅觀塘海濱公園。大家可以係觀塘海濱公園影輯靚相，之後再向九龍灣方向出海濱公園，之後會見到遙遠方向有棟Megabox，咁面向住偉業街方向行就到架喇。之後影完天橋，大家仲可以向前行去Megabox，嘆冷氣、食個下午茶、shopping行街。
Edited by SPD4459 Five Explorers: Joey Chan
SPD4459 Internet Marketing and Public Relations
如果你係紫薯控，咁你就唔可以錯過以下嘅平食紫薯三寶喇。係九龍灣淘大嘅超羣 · Maria’s bakery就有賣紫薯系列嘅小食。
紫薯大福 （$8），糯米外皮非常軟熟同煙韌，雖然 Explorers 本身唔係紫薯控，但食落都覺得幾好味。大福入面個紫薯餡唔算太甜，入面有真紫薯粒。
紫薯蛋撻（$9），牛油撻皮好脆口，內面都有大量紫薯蓉，食落紫薯加蛋撻都幾夾喎。
紫色系列仲有紫薯芝士蛋糕同紫薯牛油蛋糕，不過Explorer 今次就無試到喇，有興趣嘅朋友可以去試埋！
Edited by SPD4459 Five Explorers: Joey Chan
SPD4459 Internet Marketing and Public Relations
係香港食正宗上海菜嘅地方唔算多，但識食一定係食最正宗嘅。今次Five Explorers 就帶大家去食上海菜，感受上海的風味。
|上海一品香菜館 (觀塘) |
呢間位於觀塘廣場3樓小店，每逢晚市都會特別多人嫁。
一諗起上海菜，就一定會諗起上海小籠包。南翔小籠包 （$38/8 隻），外皮厚度適中，而裡面包住豬肉餡，食落會有啖啖肉汁。
擔擔麵 （$36） ，湯底較濃，花生醬味道會較重，辣味反而較少。但若果一個人食，好快會飽，因為都幾大碗架。
花雕醉雞（$55）冷盤菜，食落好重花雕酒味道，頭盤菜叫黎食就岩晒。
三絲炒菜膽（$ 55），三絲有邊三樣，就係有蝦仁、金華火腿、雞肉。雖然好似普普通通咁，但食落金華火腿啲味入晒去菜到，清清地又帶點咸。
韮黃炒鱔湖 ($108)，本先以為會有大量韮菜，本身以為會只得一兩舊鱔，因為鱔好貴食，點知又唔係唔喎。鱔多之餘又唔會炒得太老，帶點爽脆。
豆沙鍋餅（$ 30），食完飯食甜品係常識吧～而 Explorer 認象中呢款中式甜品唔係好多地方有得食，除左酒樓同上海菜餐廳。而今次豆沙鍋餅外皮煎到金黃色，食落脆脆的，裡面仲有足料豆沙，熱辣辣嘅豆沙鍋餅做甜品一流。
Edited by SPD4459 Five Explorers: Joey Chan
SPD4459 Internet Marketing and Public Relations
Explorers 有時都會扮下文青去cafe hea下，而今次我黎到呢間係觀塘商廈既cafe
| LM Cafe |
今次Explorers 試食左自選窩夫(淨窩夫$48，連花茶$70)。呢到4種口味既窩夫比你揀(原味，朱古力，芝士同綠茶)，揀完口味就可以睇埋想食咩味雪糕(雲呢拿，比利時朱古力，綠茶)同醬料，最後再揀埋配料等食就得啦！Explorer係朱古力控，當然係窩夫口味 雪糕同醬料都揀朱古力味啦。而配料方面就揀左士多啤梨。朱古力味窩夫十分鬆軟，同朱古力味雪糕真係prefect match，好快比explorers ko晒。而且十分重份量，如果淨叫$48真係夠抵食！
係飲品方面，Explorers 就嗌左茱莉香片綠茶。個杯望落好靚好高級，茶葉幾夠味，唔錯唔錯！
LM Cafe既野食價錢唔算貴，值得一試！
Edited by SPD4459 Five Explorers: Koey Wong
SPD4459 Internet Marketing and Public Relations
唔該一件蛋牛治烘底吖～今次 Explorers 就帶大家去觀塘食香港獨有嘅蛋牛治喇。
| SHY Dance Cafe |
唔講唔知道原來 SHY Dance Cafe 老闆原來係由前TVB兒童節目主持人伍文生（Issac)開辦嘅新式茶餐廳。去唔到深水涉新香園堅記食蛋牛治唔緊要，黎位於觀塘工廈食一樣咁好味！
今次Explorers 就試左招牌蛋牛治烘底（$24+$2烘底）。係平常嘅茶餐廳，三文治一般都會用免治牛或者罐頭牛肉。但SHY 就採用新鮮牛肉，所以食落會比較有口感，啖啖牛同多汁。
除咗蛋牛治，蛋包飯都係呢到嘅招牌菜黎。今次Explorer 就試咗龍脷柳蛋包飯同美式牛扒蛋包飯（ $45），大家仲可以揀唔同醬汁（咖喱汁/牛扒汁/燒汁）。整體來說，雞蛋都炒得滑而多蛋汁，而飯底係西炒飯，飯裡有少蘑菇，味道不錯。同埋份量好大碟，係抵食之選。
另外，今次仲試咗經典嘅超級蛋牛麵餐 （ $42）。蛋牛配上出前一丁公仔麵與平時係茶餐廳食到嘅分別不大，無特別驚喜，不過勝在大大份！
食完野，當然要叫番杯飲品嘆下啦～呢杯凍特色香濃咖啡（跟餐加 $3）出乎意料好飲，原先以為只系茶餐廳嘅凍咖啡，但飲落似平時係coffee shop的咖啡，值得一試！
Edited by SPD4459 Five Explorers: Joey Chan
SPD4459 Internet Marketing and Public Relations
今次 Five Explorers 就帶大家食宵夜，香港地道小食之一嘅豆腐花。
| 永興豆漿王 |
永興豆漿王係一間觀塘老店，已經有三十年嘅歷史。而最特別嘅地方係店鋪只會係傍晚時份開始售賣豆漿、豆腐花等等，平日時間主要售賣香港傳統中式餅食，花生糖、雞仔餅、香蕉糕、光酥餅等等。
熱豆腐花 （外賣$13），雖然價錢相比起其他店鋪偏貴，但唔食就走寶。 豆腐花好滑好嫩，充滿豆香味，再加上薑汁糖水，食落都會帶少少薑味。
凍豆漿 （大枝 $ 26），超級大枝嘅豆漿大約有1.5L，飲落豆味又濃又重，最重要係唔太甜，無好似市面上嘅豆漿加入大量糖水，好有健康嘅感覺。
如果鐘意食油炸鬼，仲可以堂食叫一碗熱豆漿加油炸鬼。平時除咗係粥店食油炸鬼，其實仲有一個傳統食法，就係將油炸鬼浸落熱豆漿，味道一樣咁好味！
Edited by SPD4459 Five Explorers: Joey Chan
Student of Internet Marketing ans Public Relations
如果要介紹香港地道小食，除左燒賣魚蛋之外當然仲有身為香港人一定食過既雞蛋仔。而今次Explorers 要介紹既就係係觀塘十分之出名既恆發雞蛋仔。
| 恆發雞蛋仔|
恆發雞蛋仔之所以出名係因為佢地既首創加料雞蛋仔。除左原味雞蛋仔同格仔餅之外，佢地仲出左九種口味，實有一款岩您心水。
而今次 Explorers 就試食紫薯雞蛋仔($21)。Explorers 好多時係街到買到既雞蛋仔D餡都唔係好滿，認真唔抵食。但係呢到既店員會將紫薯放滿係蛋漿上面，非常之足料！
等左20分鐘終於有得食啦！粒粒雞蛋仔都有紫薯，食落又唔太甜，外脆內軟，味道唔錯！因為好足料既關係，食左d都開始飽肚，所以2至3個人share食就岩岩好啦。
Edited by SPD4459 Five Explorers: Koey Wong
SPD4459 Internet Marketing and Public Relations
觀塘工廈簡直就係美食寶庫！周圍都有好多隱世加抵食的餐廳！而今次 Explorers 就帶大家去觀塘巧明街既Friendmily試下超抵食法國女皇生蠔！！！大家如果聽過Friendmily，可能會知道呢間西餐廳除左西餐同泰國菜出名之外，海鮮都一樣掂！所以今次就帶大家來試下呢度d生蠔係咪都咁掂！
試之前一定要提提大家，由於做緊優惠價，所以一定要係18:00-21:00先會有$8法國女皇生蠔！如果岩岩放工放學既朋友，同三五知已來呢道嘆返幾隻靚蠔就岩岩好喇！
落完order冇耐就已經有生蠔食喇！伴隨住法國女皇生蠔既仲有兩件檸檬同埋辣番茄醬，各位可以按自已喜好配上唔同醬汁！不過 explorers 最中意就係乜都唔加，品嘗最原汁原味既蠔喇！放到埋口已經閒到有海水味，放到入口一咬落去，蠔既鮮味同海水混合一齊，再加上蠔的口感爽口，感覺非常好！
之後仲叫左杯藍蝴蝶花茶，因為explorers 已經俾佢既顏色吸引住喇！飲落去有陣陣清新既薄荷味，加上蜂蜜的甜味，令茶既層次再度提升！不過最令小編驚喜既就係佢竟然識得變色！原因係隨茶奉上的檸檬，只要將檸檬放入茶中，茶既顏色就會瞬間由藍色變成紫色，搞到小編好似大衛·高柏飛變魔術咁！！！
Edited by SPD4459 Five Explorers: KiOn Chan
SPD4459 Internet Marketing and Public Relations
SPD4459 Made in Kwun Tong 